الأول : إلا قولي يا بلدينا مش هو دة برضه أتوبيس مصر الجديدة ؟
الثاني : على الحديدة ؟ إنت طالب إحسان ؟
الأول : بذرة الكتان ؟ تلاقيها عند العطار .
الثاني : جزار ؟ هو انت عايز لحمة ؟
الأول : زحمة ؟ أصله ميعاد خروج الموظفين .
الثاني : قمر الدين ؟ مبحبهوش
الأول : ما بتطفحهوش ؟ ليه كفى الله الشر ؟
الثاني : راس البر ؟ دة مصيف محترم .
الأول : الهرم اتخرم ؟ دي حتة جميلة .
الثاني : بليلة ؟ هو انت جعان ؟
الأول : عيان ؟ يا عم شوفلك تاكسي يوصلك لباب العمارة .
الثاني : إمارة ؟ هو انت لسة اتأمرت ؟
الأول : اتأخرت ؟ دي الساعة لسة ثلاثة .
الثاني : شحاتة ؟ ياعم شوفلك شغلانة تاكل منها عيش .
الأول : خيش ؟ دة صوف انجليزي ؟
الثاني : بنتك زيزي ؟ ربنا يخلي .
الأول : انتاج محلي ؟ دة شغل بلاد برة .
الثاني : المبرة ؟ هو انت لسة عيان ؟
الأول : دخان ؟ أصل اليومين دول السجاير بقت حراقة .
الثاني : كريم حلاقة ؟ دة أنا باستعمل انجرام .
الأول : أنا ما عنديش احترام ؟ أهو انت اللي ماعندكش احترام
( يقوم الشجار بينهم ويدخل الشاويش )
الشاويش : الله ... الله ... وكمان بتتخانقوا قدامي ؟
الأول : مين حضرة الشاويش ؟
الشاويش : وكمان تجار حشيش ؟ قدامي على السجن .
!
موضوع: اسكتش الطرش ..... حوار كوميدي 
الأربعاء يناير 18, 2012 2:22 pm
